ਹਾਕੀ ਏਸ਼ੀਆ ਕੱਪ 2025 ਵਿੱਚ ਭਾਰਤ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਸੁਪਰ-4 ਮੈਚ ਵਿੱਚ ਚੀਨ ਨੂੰ 7-0 ਨਾਲ ਹਰਾਕੇ ਫਾਈਨਲ ਵਿੱਚ ਆਪਣੀ ਜਗ੍ਹਾ ਪੱਕੀ ਕਰ ਲਈ ਹੈ। ਭਾਰਤੀ ਟੀਮ ਨੇ ਮੈਚ ਦੀ ਸ਼ੁਰੂਆਤ ਤੋਂ ਹੀ ਚੀਨ 'ਤੇ ਦਬਦਬਾ ਬਣਾਇਆ। ਸ਼ਿਲਾਨੰਦ ਲਾਕੜਾ ਨੇ ਕੇਵਲ 3ਵੇਂ ਮਿੰਟ ਵਿੱਚ ਹੀ ਗੋਲ ਕਰਕੇ ਟੀਮ ਨੂੰ ਲੀਡ ਦਿਵਾ ਦਿੱਤੀ। ਉਸ ਤੋਂ ਬਾਅਦ ਦਿਲਪ੍ਰੀਤ ਸਿੰਘ, ਮਨਦੀਪ ਸਿੰਘ ਅਤੇ ਰਾਜਕੁਮਾਰ ਪਾਲ ਨੇ ਗੋਲ ਕਰਕੇ ਸਕੋਰ ਨੂੰ 4-0 ਤੱਕ ਪਹੁੰਚਾਇਆ।
38ਵੇਂ ਮਿੰਟ ਵਿੱਚ ਸੁਖਜੀਤ ਨੇ ਪੈਨਲਟੀ ਕਾਰਨਰ ਤੋਂ ਗੋਲ ਕਰਕੇ ਲੀਡ 5-0 ਕਰ ਦਿੱਤੀ। ਅਖੀਰਲੇ ਕੁਆਰਟਰ ਵਿੱਚ ਅਭਿਸ਼ੇਕ ਨੇ ਦੋ ਗੋਲ ਕਰਦੇ ਹੋਏ ਚੀਨ ਉੱਪਰ 7-0 ਦੀ ਵੱਡੀ ਜਿੱਤ ਦਰਜ ਕਰਾਈ। ਚੀਨ ਪੂਰੇ ਮੈਚ ਦੌਰਾਨ ਕੋਈ ਵੀ ਗੋਲ ਨਹੀਂ ਕਰ ਸਕਿਆ।
ਹੁਣ ਭਾਰਤ ਐਤਵਾਰ ਨੂੰ ਹੋਣ ਵਾਲੇ ਫਾਈਨਲ ਵਿੱਚ ਦੱਖਣੀ ਕੋਰੀਆ ਦਾ ਸਾਹਮਣਾ ਕਰੇਗਾ। ਇਹ ਚੌਥੀ ਵਾਰ ਹੋਵੇਗਾ ਜਦੋਂ ਦੋਵੇਂ ਟੀਮਾਂ ਫਾਈਨਲ ਵਿੱਚ ਟਕਰਾਉਣਗੀਆਂ। ਪਹਿਲਾਂ ਤਿੰਨ ਮੁਕਾਬਲਿਆਂ ਵਿੱਚ ਕੋਰੀਆ ਨੇ ਦੋ ਵਾਰ ਜਿੱਤ ਦਰਜ ਕੀਤੀ ਹੈ, ਜਦਕਿ ਭਾਰਤ ਨੇ 2007 ਵਿੱਚ ਚੇਨਈ ਵਿੱਚ ਖੇਡੇ ਗਏ ਫਾਈਨਲ ਵਿੱਚ ਕੋਰੀਆ ਨੂੰ ਹਰਾਇਆ ਸੀ।
