ਚੰਡੀਗੜ੍ਹ ਵਿੱਚ ਸਥਿਤ ਪੀ.ਜੀ.ਆਈ. ਵਿੱਚ ਕੰਮ ਕਰ ਰਹੇ ਰੈਜ਼ਿਡੈਂਟ ਡਾਕਟਰਾਂ ਲਈ ਵੱਡੀ ਰਾਹਤ ਦੀ ਖ਼ਬਰ ਆਈ ਹੈ। ਹੁਣ ਡਾਕਟਰਾਂ ਤੋਂ ਰੋਜ਼ਾਨਾ 12 ਘੰਟਿਆਂ ਤੋਂ ਵੱਧ ਅਤੇ ਹਫ਼ਤੇ ਵਿੱਚ 48 ਘੰਟਿਆਂ ਤੋਂ ਵੱਧ ਕੰਮ ਨਹੀਂ ਕਰਵਾਇਆ ਜਾਵੇਗਾ। ਪੀ.ਜੀ.ਆਈ. ਪ੍ਰਸ਼ਾਸਨ ਨੇ ਹੁਕਮ ਦਿੱਤਾ ਹੈ ਕਿ ਸਾਰੇ ਡਾਕਟਰਾਂ ਨੂੰ ਹਫ਼ਤੇ ਵਿੱਚ ਇੱਕ ਦਿਨ ਦੀ ਛੁੱਟੀ ਜ਼ਰੂਰ ਦਿੱਤੀ ਜਾਵੇ। ਇਸ ਦਾ ਮਕਸਦ ਹੈ ਕਿ ਡਾਕਟਰਾਂ ’ਤੇ ਕੰਮ ਦਾ ਬੋਝ ਘੱਟ ਹੋਵੇ ਅਤੇ ਉਹ ਮਰੀਜ਼ਾਂ ਨੂੰ ਵਧੀਆ ਢੰਗ ਨਾਲ ਇਲਾਜ ਦੇ ਸਕਣ।
ਅਕਸਰ ਰੈਜ਼ਿਡੈਂਟ ਡਾਕਟਰ ਲਗਾਤਾਰ ਲੰਬੀਆਂ-ਲੰਬੀਆਂ ਸ਼ਿਫਟਾਂ ਵਿੱਚ ਕੰਮ ਕਰਦੇ ਹਨ। ਇਸ ਨਾਲ ਉਨ੍ਹਾਂ ਨੂੰ ਥਕਾਵਟ, ਤਣਾਅ ਅਤੇ ਮਾਨਸਿਕ ਦਬਾਅ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਲੰਮੇ ਸਮੇਂ ਤੋਂ ਡਾਕਟਰਾਂ ਦੀ ਇਹੀ ਸ਼ਿਕਾਇਤ ਰਹੀ ਕਿ ਉਨ੍ਹਾਂ ਤੋਂ ਹਫ਼ਤੇ ਵਿੱਚ 60–70 ਘੰਟਿਆਂ ਤੱਕ ਕੰਮ ਲਿਆ ਜਾਂਦਾ ਹੈ।
ਆਰਾਮ ਕਰਨ ਦਾ ਮਿਲੇਗਾ ਸਮਾਂ
ਹੁਣ ਨਵੇਂ ਹੁਕਮ ਨਾਲ ਡਾਕਟਰਾਂ ਨੂੰ ਆਰਾਮ ਕਰਨ ਦਾ ਸਮਾਂ ਮਿਲੇਗਾ ਅਤੇ ਉਹ ਹੋਰ ਧਿਆਨ ਅਤੇ ਉਰਜਾ ਨਾਲ ਮਰੀਜ਼ਾਂ ਦੀ ਸੇਵਾ ਕਰ ਸਕਣਗੇ। ਇਹ ਹੁਕਮ ਡੀਨ ਅਕੈਡਮਿਕ, ਸਬ-ਡੀਨ, ਸਾਰੇ ਵਿਭਾਗ ਮੁਖੀਆਂ, ਰਜਿਸਟਰਾਰ ਅਤੇ ਰੈਜ਼ਿਡੈਂਟ ਡਾਕਟਰਜ਼ ਅਸੋਸੀਏਸ਼ਨ (RDA) ਦੇ ਪ੍ਰਧਾਨ ਨੂੰ ਭੇਜੇ ਗਏ ਹਨ। ਵਿਭਾਗ ਮੁਖੀਆਂ ਨੂੰ ਇਹ ਵੀ ਕਿਹਾ ਗਿਆ ਹੈ ਕਿ ਨਿਯਮ ਦੀ ਪਾਲਣਾ ਹੋ ਰਹੀ ਹੈ ਜਾਂ ਨਹੀਂ, ਇਸ ਦੀ ਰਿਪੋਰਟ ਨਿਯਮਿਤ ਤੌਰ ’ਤੇ ਡੀਨ ਨੂੰ ਭੇਜੀ ਜਾਵੇ।
ਡਾਕਟਰਾਂ ਨੇ ਕੀਤਾ ਸਵਾਗਤ
ਰੈਜ਼ਿਡੈਂਟ ਡਾਕਟਰਜ਼ ਅਸੋਸੀਏਸ਼ਨ (RDA) ਦੇ ਪ੍ਰਧਾਨ ਡਾ. ਵਿਸ਼ਨੂ ਜਿੰਜਾ ਨੇ ਕਿਹਾ ਕਿ ਇਹ ਫ਼ੈਸਲਾ ਡਾਕਟਰਾਂ ਲਈ ਰਾਹਤ ਅਤੇ ਪ੍ਰੇਰਣਾ ਦੋਵੇਂ ਲੈ ਕੇ ਆਇਆ ਹੈ। ਇਸ ਨਾਲ ਡਾਕਟਰਾਂ ਅਤੇ ਮਰੀਜ਼ਾਂ ਦੋਵਾਂ ਨੂੰ ਫ਼ਾਇਦਾ ਹੋਵੇਗਾ। ਉਨ੍ਹਾਂ ਨੇ ਕਿਹਾ ਕਿ ਰੈਜ਼ਿਡੈਂਟ ਡਾਕਟਰ ਦਿਨ-ਰਾਤ ਹੋਰਾਂ ਦੀ ਸੇਵਾ ਵਿੱਚ ਲੱਗੇ ਰਹਿੰਦੇ ਹਨ। ਐਸੇ ਵਿੱਚ ਇਹ ਕਦਮ ਉਨ੍ਹਾਂ ਲਈ ਇਨਸਾਨੀ ਅਤੇ ਸਕਾਰਾਤਮਕ ਬਦਲਾਵ ਹੈ।
