ਬਾਲੀਵੁੱਡ ਦੇ 'ਸੰਜੂ ਬਾਬਾ' ਯਾਨੀ ਸੰਜੇ ਦੱਤ ਇੱਕ ਵਾਰ ਫਿਰ ਵੱਡੇ ਪਰਦੇ 'ਤੇ ਆਪਣੇ ਸਭ ਤੋਂ ਚਰਚਿਤ ਅਤੇ ਖ਼ੌਫ਼ਨਾਕ ਕਿਰਦਾਰ 'ਬੱਲੂ' ਦੇ ਰੂਪ ਵਿੱਚ ਵਾਪਸੀ ਕਰਨ ਜਾ ਰਹੇ ਹਨ। ਸਾਲ 1993 ਵਿੱਚ ਆਈ ਬਲਾਕਬਸਟਰ ਫਿਲਮ 'ਖਲਨਾਇਕ' ਦੇ 33 ਸਾਲ ਪੂਰੇ ਹੋਣ 'ਤੇ ਅਦਾਕਾਰ ਨੇ ਇਸ ਦੇ ਸੀਕੁਅਲ 'ਖਲਨਾਇਕ ਰਿਟਰਨਜ਼' (Khalnayak Returns) ਦਾ ਅਧਿਕਾਰਤ ਐਲਾਨ ਕਰ ਦਿੱਤਾ ਹੈ। ਫਿਲਮ ਦੇ ਪਹਿਲੇ ਲੁੱਕ ਟੀਜ਼ਰ ਨੇ ਸੋਸ਼ਲ ਮੀਡੀਆ 'ਤੇ ਆਉਂਦੇ ਹੀ ਧਮਾਲ ਮਚਾ ਦਿੱਤੀ ਹੈ।
ਜਾਰੀ ਕੀਤੇ ਗਏ ਐਲਾਨ ਵੀਡੀਓ (Announcement Video) ਵਿੱਚ ਸੰਜੇ ਦੱਤ ਦਾ ਬੇਹੱਦ ਤਾਕਤਵਰ ਅਤੇ ਡਰਾਉਣਾ ਲੁੱਕ ਦਿਖਾਇਆ ਗਿਆ ਹੈ। ਟੀਜ਼ਰ ਦੀ ਸ਼ੁਰੂਆਤ ਖ਼ੂਨ-ਖ਼ਰਾਬੇ, ਅੱਗ ਦੀਆਂ ਲਪਟਾਂ ਅਤੇ ਚਾਰੇ ਪਾਸੇ ਖਿੱਲਰੀਆਂ ਲਾਸ਼ਾਂ ਦੇ ਦ੍ਰਿਸ਼ ਨਾਲ ਹੁੰਦੀ ਹੈ। ਲੰਬੇ ਵਾਲਾਂ, ਵਧਾਈ ਹੋਈ ਦਾੜ੍ਹੀ ਅਤੇ ਜ਼ਖ਼ਮੀ ਚਿਹਰੇ ਦੇ ਨਾਲ ਸੰਜੇ ਦੱਤ ਸਿਗਾਰ ਜਲਾਉਂਦੇ ਹੋਏ ਨਜ਼ਰ ਆ ਰਹੇ ਹਨ। ਵੀਡੀਓ ਦੇ ਅੰਤ ਵਿੱਚ ਸੰਜੇ ਦੱਤ ਆਪਣਾ ਮਸ਼ਹੂਰ ਡਾਇਲਾਗ ਦੁਹਰਾਉਂਦੇ ਹਨ:
"ਬੋਲਾ ਥਾ ਨਾ, ਰਾਤ ਦੇ 10 ਵਜੇ ਬੱਲੂ ਜੇਲ੍ਹ ਤੋਂ ਫੁਰਰਰ... ਨਾਇਕ ਨਹੀਂ ਖਲਨਾਇਕ ਹੂੰ ਮੈਂ।"
ਸੰਜੇ ਦੱਤ ਨੇ ਆਪਣੇ ਇੰਸਟਾਗ੍ਰਾਮ ਹੈਂਡਲ 'ਤੇ ਇਸ ਟੀਜ਼ਰ ਨੂੰ ਸਾਂਝਾ ਕਰਦਿਆਂ ਲਿਖਿਆ, "ਕੁਝ ਕਹਾਣੀਆਂ ਕਦੇ ਖ਼ਤਮ ਨਹੀਂ ਹੁੰਦੀਆਂ, ਉਹ ਮੁੜ ਸ਼ੁਰੂ ਹੁੰਦੀਆਂ ਹਨ। ਖਲਨਾਇਕ ਰਿਟਰਨਜ਼।" ਹਾਲਾਂਕਿ ਇਸ ਫਿਲਮ ਵਿੱਚ ਸੰਜੇ ਦੱਤ ਤੋਂ ਇਲਾਵਾ ਹੋਰ ਕਿਹੜੇ ਕਲਾਕਾਰ ਨਜ਼ਰ ਆਉਣਗੇ, ਇਸ ਬਾਰੇ ਅਜੇ ਸਸਪੈਂਸ ਬਰਕਰਾਰ ਹੈ। ਦਰਸ਼ਕ ਇਹ ਜਾਣਨ ਲਈ ਬੇਤਾਬ ਹਨ ਕਿ ਕੀ ਮਾਧੁਰੀ ਦੀਕਸ਼ਿਤ ਅਤੇ ਜੈਕੀ ਸ਼ਰਾਫ ਵੀ ਇਸ ਦਾ ਹਿੱਸਾ ਹੋਣਗੇ ਜਾਂ ਨਹੀਂ।
ਟੀਜ਼ਰ ਦੇਖਣ ਤੋਂ ਬਾਅਦ ਸੰਜੇ ਦੱਤ ਦੇ ਪ੍ਰਸ਼ੰਸਕਾਂ ਵੱਲੋਂ ਜ਼ਬਰਦਸਤ ਪ੍ਰਤੀਕਿਰਿਆਵਾਂ ਮਿਲ ਰਹੀਆਂ ਹਨ। ਇੱਕ ਯੂਜ਼ਰ ਨੇ ਲਿਖਿਆ, "ਬਾਬਾ ਆਪਣੇ ਅਸਲੀ ਰਾਜ ਵਿੱਚ ਵਾਪਸ ਆ ਗਏ ਹਨ," ਜਦਕਿ ਇੱਕ ਹੋਰ ਨੇ ਕਿਹਾ, "ਬੱਲੂ ਬਲਰਾਮ ਵਰਗਾ ਖਲਨਾਇਕ ਕੋਈ ਦੂਜਾ ਨਹੀਂ ਹੋ ਸਕਦਾ।"
ਸੁਭਾਸ਼ ਘਈ ਦੀ ਨਿਰਦੇਸ਼ਨਾ ਹੇਠ ਬਣੀ 'ਖਲਨਾਇਕ' ਨੇ ਆਪਣੇ ਸਮੇਂ ਵਿੱਚ ਕਮਾਈ ਦੇ ਸਾਰੇ ਰਿਕਾਰਡ ਤੋੜ ਦਿੱਤੇ ਸਨ। ਹੁਣ ਦੇਖਣਾ ਇਹ ਹੋਵੇਗਾ ਕਿ 33 ਸਾਲਾਂ ਬਾਅਦ 'ਬੱਲੂ' ਦਾ ਇਹ ਨਵਾਂ ਅਵਤਾਰ ਬਾਕਸ ਆਫਿਸ 'ਤੇ ਕੀ ਨਵਾਂ ਇਤਿਹਾਸ ਸਿਰਜਦਾ ਹੈ।
